പത്തനംതിട്ട നഗരത്തിനോട് ചേർന്നുള്ള ഭാഗത്ത് കഴിഞ്ഞ ദിവസം രാത്രി നടന്ന വീട് കുത്തിത്തുറന്നുള്ള വൻ കവർച്ചയുമായി ബന്ധപ്പെട്ട് രണ്ട് പ്രതികളെ പോലീസ് അറസ്റ്റ് ചെയ്തു. പത്തനംതിട്ട ഡിവൈഎസ്പി കെ. സജീവിന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് ഇവരെ പിടികൂടിയത്. പുത്തൻപറമ്പിൽ സ്വദേശി വിഷ്ണു (28), അടൂർ പറക്കോട് സ്വദേശി രഞ്ജിത്ത് (32) എന്നിവരാണ് പിടിയിലായത്. ഇവരിൽ നിന്ന് കവർന്ന സ്വർണവും പണവും ഇലക്ട്രോണിക് ഉപകരണങ്ങളും കണ്ടെടുത്തിട്ടുണ്ട്. കഴിഞ്ഞ തിങ്കളാഴ്ച രാത്രിയിലാണ് സംഭവം നടന്നത്. വീട്ടുകാർ ബന്ധുവീട്ടിൽ പോയ സമയം നോക്കി വീടിന്റെ മുൻവാതിൽ പൊളിച്ച് അകത്ത് കയറിയ മോഷ്ടാക്കൾ കിടപ്പുമുറിയിലെ അലമാരയിൽ സൂക്ഷിച്ചിരുന്ന 20 പവൻ സ്വർണാഭരണങ്ങളും 50,000 രൂപയും ഒരു ലാപ്ടോപ്പും മറ്റ് ഇലക്ട്രോണിക് ഉപകരണങ്ങളും കവരുകയായിരുന്നു. രാവിലെ തിരിച്ചെത്തിയ വീട്ടുകാരാണ് മോഷണവിവരം പോലീസിനെ അറിയിച്ചത്.